ຕອນເຊົ້າຂອງວັນທີ 06 ພະຈິກ 2024 ຢູ່ທີ່ບ້ານໄຊບົວທອງ, ເມືອງວຽງທອງ, ແຂວງບໍລິຄຳໄຊ ບໍລິສັດ ເທີນ-ຫີນບູນ ພາວເວີ ຈຳກັດ ໄດ້ນຳເອົາເຄື່ອງຊ່ວຍເຫຼືອມາມອບໃຫ້ແກ່ນ້ອງນັກຮຽນໂຮງຮຽນປະຖົມ ແລະ ປະຊາຊົນບ້ານໄຊບົວທອງ. ທ່ານ ແສງອາລຸນ ພວງສະຫວ່າງ, ຫົວໜ້າທີມປະສານງານລັດຖະບານ ຕາງໜ້າຜູ້ບໍລິຫານຂອງບໍລິສັດ ໄດ້ມອບເຄື່ອງດັ່ງກ່າວໃຫ້ແກ່ທ່ານ ບົງແພງ ໄຊຍະພອນ, ນາຍບ້ານໄຊບົວທອງ ໂດຍການເຂົ້າຮ່ວມເປັນສັກຂີພະຍານຂອງຕາງໜ້າຫ້ອງວ່າການປົກຄອງເມືອງວຽງທອງ, ຫ້ອງການສຶກສາທິການ ແລະ ກິລາເມືອງວຽງທອງ, ອຳນວຍການໂຮງຮຽນປະຖົມສົມບູນ,ອົງການປົກຄອງບ້ານ, ພໍ່ແມ່ປະຊາຊົນ, ນ້ອງນັກຮຽນ ແລະ ພະນັກງານບໍລິສັດ ເທີນ-ຫີນບູນ ພາວເວີ ຈຳກັດ. ບັນດາເຄື່ອງຊ່ວຍເຫຼືອທີ່ນຳມາມອບໃຫ້ແກ່ໂຮງຮຽນ ກໍ່ຄືນ້ອງນັກຮຽນ ແລະ ພໍ່ແມ່ປະຊາຊົນບ້ານ ໄຊບົວທອງ ຄັ້ງນີ້ປະກອບມີ: ຄອມພິວເຕີຕັ້ງໂຕະ 01 ຊຸດ, ເຄື່ອງພິມເອກະສານ 01 ເຄື່ອງ, ປຶ້ມຕຳລາຮຽນຂອງຊັ້ນປໍ 1 ຮອດຊັ້ນ ປໍ 5 ຈຳນວນ 30

ຊຸດ, ປຶ້ມຂຽນ 350 ຫົວ, ບິກຂຽນ 200 ກ້ານ, ສໍດຳ 132 ກ້ານ, ຢາງລຶບ 96 ກ້ອນ, ໂຮງແຫຼມສໍ 112 ອັນ, ໄມ້ບັນທັດ 144 ອັນ. ນອກນັ້ນ, ຍັງມີອຸປະກອນກິລາ ແລະ ເຄື່ອງໃຊ້ບາງປະເພດເຊັ່ນ: ໝາກບານເຕະ 02 ໜ່ວຍ, ຕາໜ່າງໂກນ 02 ອັນ, ກະຕໍ້ 02 ໜ່ວຍ, ຕາໜ່າງກະຕໍ້ 01 ອັນ ແລະ ມຸ້ງກາງນອນຈໍານວນ 106 ຜືນ; ລວມມູນຄ່າຄວາມຊ່ວຍເຫຼືອຄັ້ງນີ້ແມ່ນ 30,434,000 ກີບ.

ແສງອາລຸນ ພວງສະຫວ່າງ, ຫົວໜ້າທີມປະສານງານລັດຖະບານ ໄດ້ໃຫ້ຮູ້ວ່າ: ງົບປະມານທີ່ນຳມາຈັດຊື້ອຸປະກອນ ແລະ ເຄື່ອງຊ່ວຍເຫຼືອໃນຄັ້ງນີ້ ແມ່ນໄດ້ມາຈາກການປະກອບສ່ວນງົບປະມານສ່ວນຕົວຂອງອ້າຍເອື້ອຍນ້ອງພະນັກງານບໍລິສັດ ເທີນ-ຫີນບູນ ໂດຍສົມທົບກັບງົບປະມານຂອງບໍລິສັດ, ຊຶ່ງກິດຈະກຳດັ່ງກ່າວນີ້ແມ່ນໜຶ່ງໃນບັນດາກິດຈະກຳຊ່ວຍເຫຼືອສັງຄົມຂອງບໍລິສັດ ທີ່ໄດ້ຈັດຂຶ້ນເປັນປະຈຳ ໂດຍບໍລິສັດຈະເລັງໃສ່ເປົ້າໝາຍຢູ່ເຂດຊົນນະບົດ ທີ່ມີຄວາມຂາດເຂີນທາງດ້ານງົບປະມານ ແລະ ບໍມີທ່າແຂກເຂົ້າຫາຄວາມຊ່ວຍເຫຼືອຈາກພາກສ່ວນອື່ນ.

ທ່ານ ບົວແພງ ໄຊຍະພອນ, ເລຂາໜ່ວຍພັກ, ນາຍບ້ານໄຊບົວທອງ ໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງຜູ້ບໍລິຫານ, ອ້າຍນ້ອງພະນັກງານ ບໍລິສັດ ເທີນ-ຫີນບູນ ພາວເວີ ຈຳກັດ ທີ່ໄດ້ນຳເອົາເຄື່ອງຊ່ວຍເຫຼືອມາມອບໃຫ້ແກ່ໂຮງຮຽນໃນຄັ້ງນີ້. ທາງອົງການປົກຄອງບ້ານ, ຄະນະອຳນວຍການໂຮງຮຽນ ແລະ ພໍ່ແມ່ປະຊາຊົນບ້ານໄຊບົວທອງ ຂໍຈາລຶກບຸນຄຸນ ແລະ ການຊ່ວຍເຫຼືອຂອງບໍລິສັດຄັ້ງນີ້ໃຫ້ຢູ່ກັບພວກຕະຫຼອດໄປ.  

ບໍລິສັດ ເທີນ-ຫີນບູນ ພາວເວີ ຈຳກັດ ຍາມໃດກໍ່ໃຫ້ຄວາມສຳຄັນຕໍ່ການພັດທະນາຊັບພະຍາກອນມະນຸດ ກໍ່ຄືສ້າງຄວາມເຂັ້ມແຂງໃຫ້ແກ່ຂະແໜງສຶກສາ ໂດຍສະເພາະແມ່ນແນໃສ່ບັນດາບ້ານຢູ່ເຂດຊົນນະບົດ ແລະ ຢູ່ເຂດຫ່າງໄກສອກລີກ. ນອກຈາກນັ້ນ, ບໍລິສັດຍັງໄດ້ໃຫ້ບຸລິມະສິດແກ່ວຽກງານປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍປະຕິບັດຕາມທິດທາງຂອງບໍລິສັດຄື: ກ້າວໄປສູ່ການເປັນຕົວແບບໃນພັດທະນາໂຄງການໄຟຟ້ານ້ຳຕົກແບບຍືນຍົງ,ເປັນມິດກັບສິ່ງແວດລ້ອມຂອງ ສປປ ລາວ ແລະ ມຸ່ງໝັ້ນກ້າວໄປສູ່ການຄຸ້ມຄອງ ແລະ ການບໍລິຫານຕາມມາດຖານສາກົນ.